បាត់ដំបង៖ អភិបាលខេត្តបាត់ដំបង លោក សុខ លូ បានឲ្យដឹងថាអាជ្ញាធរបានបង្ក្រាបបទល្មើសនេសាទជាច្រើនក្នុងភូមិសាស្ត្រនៃខេត្តបាត់ដំបង ដែលក្នុងនោះមិនមានបទល្មើសធំៗនោះទេ ស្របពេលអជ្ញាធរក្នុងខេត្តនេះគ្រោងបើកយុទ្ធនាការដកហូតឧបរកណ៍នេសាទខុសច្បាប់តាមរយៈការធ្វើជំរឿនលក្ខណៈទ្រង់ទ្រាយធំ។

ការលើកឡើងនេះធ្វើឡើងក្នុងកិច្ចប្រជុំសាមញ្ញលើកទី៣៥ របស់ក្រុមប្រឹក្សាខេត្ត អាណត្តិទី៣ នៅសាលាខេត្តបាត់ដំបង នៅថ្ងៃទី២០ ខែមីនា ឆ្នាំ២០២២។

លោកអភិបាលបានបានឲ្យដឹងទៀតថា រដ្ឋបាលខេត្តបានបង្កើតទីបញ្ជាការស្រាលមួយនៅកណ្តាលបឹងទន្លេសាប ជិតព្រំប្រទល់ខេត្តសៀមរាប និងខេត្តពោធិសាត់ផងដែរ។ លោកអភិបាលខេត្តបានបង្ហាញការជឿជាក់ថា តាមរយៈការបង្កើតទីបញ្ជាការនេះ នឹងពុំអាចមានបទល្មើសធំៗចូលមកក្នុងភូមិសាស្ត្រខេត្តបាត់ដំបងបានឡើយ។

លោកក៏បានបង្ហាញការបារម្ភផងដែរពីបទល្មើសនេសាទដែលនៅតែបន្តតាមរយៈការប្រើប្រាស់ឧបករណ៍នេសាទខុសច្បាប់ផ្សេងៗ។

លោកបន្តថា៖ «អ្វីដែលជាក្តីកង្វល់ ក្នុងភូមិសាស្ត្រខេត្តបាត់ដំបងយើង គឺបទល្មើសឆក់ត្រី នៅតែកើតមាន ហើយយើងក៏បានជូនដំណឹងដល់ប្រជានេសាទឱ្យប្រគល់ឧបករណ៍នេសាទខុសច្បាប់មកអាជ្ញាធរមានសមត្ថកិច្ច ហើយនៅថ្ងៃខាងមុខនេះ យើងនឹងមានយុទ្ធនាការជំរឿនតាមផ្ទះ ដើម្បីដកហូតយកឧបករណ៍នេសាទខុសច្បាប់ទាំងនោះ បើមានជួបនឹងបញ្ហានេះសាម៉ីខ្លួននឹងត្រូវប្រឈមចំពោះមុខច្បាប់»។

អាជ្ញាធរខេត្តបាត់ដំបងគ្រោងបើកយុទ្ធនាការធ្វើជំរឿនតាមផ្ទះប្រជានេសាទក្រោមទ្រង់ទ្រាយធំ ដើម្បីដកហូតយកឧបករណ៍នេសាទខុសច្បាប់ ខណៈប្រជានេសាទខ្លះមិនព្រមប្រគល់ឧបករណ៍នេសាទខុសច្បាប់មកអាជ្ញាធរ។

អភិបាលខេត្តរូបនេះបន្ថែមថា ការបង្ក្រាបបទល្មើសនេសាទរហូតមកដល់ពេលនេះ អាជ្ញាធរខេត្ត ស្រុក រួមទាំងសមត្ថកិច្ចពាក់ព័ន្ធទាំងអស់នឹងបន្តធ្វើជាប់ជានិច្ចស្របតាមបទបញ្ជារបស់សម្តេចតេជោ ហ៊ុន សែន៕